Pastelldraum

tittei!

2011-11-29T22:51:00.001+01:00

No som eg har eplabutikk,

samt tusen andre prosjekt,

tenkte eg det var lurt

å blogge meir målretta.

Så eg har laga ein blogg til:

DROPE DESIGN!

..og har allereie lagt ut nokre innlegg:

Om telysstjerner..

Og om grammokunst,

eller veggvinyl..

som begge kan kjøpast her:

På den bloggen legg eg berre ut

mine kreative prosjekt, idéar, og resultat,

som vidare blir lagt ut på epla for salg!

Om du har lyst å kike innom, blir eg veldig glad!

Det kikar kanskje eit innlegg fram her inne av og til,

om eg plutseleg skreiv eit dikt.. eller gjekk tur med kameraet,

eller fekk lyst å skrive ei novelle, måle ein vegg,

eller kanskje noko anna rart, fint, eller lurt..

Kven veit?

GrØn RetRo

2011-09-28T18:04:00.000+02:00

Sofaen min

er grøn,

verkeleg grøn!

Og eg
likar det
betre og betre!

Drope Design!

2011-09-23T23:24:00.000+02:00

Endeleg er den ferdig,

og du er veldig velkomen

til å kike innom!

Trykk på biletet for å kome til butikken,

og om du likar det du ser kan du trykke her,

for å kome til Drope Design på facebook.

REdeSigN: knapperingar

2011-09-21T23:47:00.000+02:00

Ein liten raud,

med kvit dekor,

og perleblom i midten.

Og tre blå,

i ulike nyansar,

samt storleikar.

No ligg dei berre

og gledar seg

til butikken opnar!

Og du!

Eg er så glad, så glad,

for no er namnet bestemt,

nemleg Drope Design!

Korleis kling det

i dine øyrer? ;)

dovendyr med mål for dagen

2011-09-20T14:39:00.000+02:00

biletet er lenka til kjelda.

I dag sov eg litt for lenge,

men skal likevel få tatt

fine fotografi av alle

ringane, øyredobbane, og smykka 

som skal inn i eplabutikken.

Den opnar så snart, så snart,
og plutseleg er den her!

REdeSigN: lille herr O Ransj

2011-09-19T23:51:00.000+02:00

Då er han her,

den lille oransje!

Og han er like blid
som dei to andre!

 
Men desverre var der berre
tre elefantar å finne,
og enn så lenge er denne 
siste elefant ut.

..Kva for ein elefant

likte du best?
Turkis, brun eller oransj? 

REdeSigN: neste elefant ut!

2011-09-17T19:24:00.001+02:00

Denne var faktisk ferdig fyrst,

men er nummer to av tre

som skal ut på bloggen.

Den tredje kikar fram 

på bloggen på måndag,

og er kvit med oransje striper!

In english please?

I made three little elephants,

this is the second one I've posted,

and the last one pops up on monday!

perler på ei snor

2011-09-15T07:00:00.000+02:00

Perler på ei snor,

som du kan henge

i øyreflippane.

Treperlene er
eit godt døme
på gjenbruk av
rusk og rask
eg fann i heimen,
etter ting og tang
som har gått i knas.

REdeSigN: turkis elefantsmykke

2011-09-14T09:46:00.000+02:00

I juni lagde eg

tre elefantsmykke,

men dei vart aldri

heilt ferdige..

før eg fann fram,

malepenselen,

og fine fargar.

Også denne

turkise elefanten

ventar i spenning

på å kome i butikken,

som opnar på epla.no,

så snart den er klar..

- In english please?

I made some necklaces in June,

but they weren't perfect until

I painted the little figures in matching colors.

Now they are just waiting for the rest of my products

to become perfect as well, and then you can buy them on epla.no!

dAns på pApiR!

2011-09-13T17:51:00.001+02:00

I dag sprang

idéane ivrig

langs penselen,

bada i dammen,

og dansa på papiret.

Det beste er at

dagen endå er ung,

og full av blanke ark!

REdeSigN: smykke

2011-09-12T18:57:00.000+02:00

For lenge, lenge sidan

hadde eg eit armband

som blei ødelagt.

Så eg

bøygde det litt,

og pynta med

grøn tråd, og

vips så blei det

eit anheng!

Men eg brukar det aldri,

for det har eg spart

til den dagen

eg opnar min eigen

kikebutikk på epla,

eller noko slikt.

Og den dagen kjem

om ikkje så alt for lenge,

og eg ville berre sei

at eg gledar meg!

eit DikT frå mEg til DeG

2011-09-08T21:37:00.000+02:00

Eg tenkte "hei" ut i lufta,

og trykte på dei:

tre små bokstavar,

blei tittelitei!

Dei spratt fram på planken,

som av rein magi.

Skriv også du,

så snart du får tid!

Vil berre takke

for at du er her,

og støtt ser på planken

og håpar der er

noko nytt til å kvile

augene på.

Den som leitar skal finne,

den som ventar, får sjå.

Hjarteleg takk

for at du tek deg tid

til å kike litt rundt

i pastellverda mi!

REdeSigN: trylletusj & perledropar

2011-09-07T22:51:00.000+02:00

Desse knappane

fekk nytt liv

med trylletusj

og perledropar

 Det vetle som står att, 

er noko som 

forhindrar at dei dett 

av når ein vil 

pynte seg med dei!

REdeSigN: knappar i(gjen) øyrene

2011-08-23T14:21:00.000+02:00

Eg må innrømme

at på søndag

lagde eg ingenting.

Men det var søndag det,

og så var det dei andre dagane,

som såg litt slik ut:

Eg hadde heilt gløymt

at søndagar må ein unne seg,

for å lade opp til ei ny veke.

Så alle søndagar frå no

skal fyllast med noko fint,

som nokon andre har laga.

For med nylada batteri,

kan mandagane starte litt slik:

Ei LitA pÅmiNniNg

2011-08-18T22:07:00.000+02:00

Ei lita påminning

heng over pulten,

saman med postkort

frå halve Europa.

Frå i dag

skal noko bli til

kvar dag,

i hendene mine.

oG Eg liKaR dEt!

sÅ saNt dEr eR fArGaR

2011-08-09T18:44:00.000+02:00

ViL eG mALe!

HÅP

2011-08-07T16:20:00.001+02:00

Eg vil skrive,
så sant der er ord.

Eg vil male,
så sant der er fargar.

Eg vil ta bilete,
så sant der er motiv.

Eg vil danse,
så sant der er musikk.

Eg vil synge,
så sant eg har stemme.

Eg vil leve,
så sant eg er,

og oppleve ho,
så sant verda er.

EnkElt & gOdt!

2011-07-19T20:22:00.001+02:00

..alt du treng er

vaniljekesam & piska krem,

jordbær & daim,

..og gjerne nokre fine skåler,

så auga også blir mette.

..HimmmmmElSk!

tips:

alle frukter & bær
gjer godt i slik dessert,
åleine eller ilag,
i går som i dag.

KetTi fOtoVeSke

2011-07-16T13:25:00.001+02:00

På den fine bloggen til Mrs. Hardy, kan du vinne ei lekker Ketti fotoveske. For meg er den i dyraste laget, så eg kryssar fingrane med fire lodd i ermet.

Det stakkars kameraet mitt fortenar å ligge trygt i ei nydeleg veske, synes eg. Og eg har så inderleg lyst på denne:

MuSic mAkEs mE sMiLe

2011-07-12T21:03:00.000+02:00

Det er alltid spanande

med skattejakt

på bestemor sitt loft,

der ein alltid finn

noko nytt gamalt!

Sist fann eg ein bunke

gamle grammofonplater,

som kanskje også i sitt nye liv

får folk til å danse!

sMå GleDeR

2011-07-04T20:04:00.000+02:00

Fine fargar, artige mønster, og røffe merkelappar

er slikt som kostar ein lite, men skaper stor glede.

..i alle fall i mitt sinn, og vetle krypinn.

Førebels står rullane til pynt som dei er,

men dei ventar i spenning..

tre elefantar

2011-06-26T15:15:00.001+02:00

tre elefantar

fekk nytt liv

med perler, tråd,

.. og ei klype tid!

Elefantane fann eg på Lei Kolleksjon Brukthandel,

ein fantastisk bruktbutikk i Skostredet i Bergen,

..der eg er så heldig å ha fått meg jobb!

Så for tida smiler eg som ein liten elefant.

Ha ein strålande søndag!

vassfarga mote

2011-06-21T22:37:00.000+02:00

fargerikt leikande fint

2011-06-11T19:06:00.000+02:00

Alisa Burke sin fantastiske kunst

er ei finfin inspirasjonskjelde

når ein har lyst å skape noko

leikande fint, og fargerikt!

Og dette sprang ut av min inspirasjon:

Når eg kjem heim

vil eg male over

med vassfargar,

trur eg, kanskje..

kanskje ikkje?

Slike drodleteikningar likte eg godt

å teikne då eg var ei lita jente,

og eg skjønar ikkje korfor eg slutta!

Kanskje trudde eg

eg var blitt for vaksen for drodling?

Kanskje trudde eg

eg ikkje lenger hadde tid?

Kanskje trudde eg feil

uansett grunnen til at eg slutta,

for drodling er fantastisk!

Ugla

2011-06-09T15:24:00.000+02:00

Eg har fått heilt dilla

på å teikne og å male ugler, faktisk!

Denne ugla skal henge

på hytta til svigerfamilien,

og sjå lur og rar ut,

som ugler ofte gjer.

Gåver

2011-06-05T23:44:00.000+02:00

Det å finne ei gåve

er ikkje alltid like lett,

og det kan ta tid..

Så korfor ikkje bruke tida

på å lage noko fint sjølv?

For når fine jenter blir tjue

fortenar dei noko fint i gåve..

så eg spesialdesigna like gjerne eit armband

denne vetle

sminkeveska..

Eg synes i alle fall det er mykje kjekkare

å gje ei gåve som eg sjølv

har brukt tid og omtanke på..

..og så er det så kjekt når den fell i smak!

Og det gjer den som regel, heldigvis :)

ein god sirkel

2011-05-29T16:31:00.000+02:00

Eg hentar inspirasjon over alt,
og det som er så fint,
er at ein kan bli inspirert
av andre sine kreasjonar.

Det er ein god sirkel, det!

Desse putene har grandtanta mi laga. Den runde er til og med laga av det same stoffet eg har på bunadsvesten min, som ho også har sydd til meg! Mønstera på dei to andre har ho designa sjølv.
Det i midten er stofftrykk, og det til høgre er brodert. Fint vel!

Og så heldig er eg,
at dei prydar stova vår!

Av og til

2011-05-25T14:19:00.001+02:00

kan ein
puste eit måleri,
måle ein song,
synge ein blome,
plukke ei sky,

og sveve
utan vinger?

Eg trur, eg trur på sommaren!

2011-05-23T18:02:00.000+02:00

Ein lengt etter dei som var,
men mest etter dei som kjem.

No er han her snart,
vakre sommaren!

pustepause

2011-05-02T20:45:00.000+02:00

Eg og skriv og skriv, men kjem aldri til konklusjonen.

Då hjelper det med litt pausemusikk,
og no pustar eg inn Mumford & Sons.
Herleg britisk folk-rock!

Musikk er ein av mange ting som gjer det lettare å puste,
ikkje berre trekke inn luft, men faktisk puste!
Akkurat som det å vere i live ikkje betyr at ein lever.
Vel, eg lever, for det er så masse fint å leve for:

Og så tenkjer eg på kor fint det er å male, og at det skal eg få lov til straks etter eksamen..

Og så er det godt å puste inn litt natur i lesepausane..

Det er ekstra fint å puste inn solnedgongen, viss om at sola alltid kjem tilbake neste dag.

Og alt ein treng er luft og kjærleik, har eg høyrt.

Då er det ekstra fint å ha finfine vener, og ein sånn ein:

..som passar på hjartet mitt, samt passar så fint inni det.

Kor finn du pusterom?

DIY: Skinnveske

2011-04-22T15:40:00.000+02:00

Denne sydde eg i går av nokre skinnrestar, foret av ei gamal bukse, og ein gamal glidelås. Me hadde til mi store glede ei spesialnål til å sy skinn for hand liggande heime. Pappa viste meg korleis eg brukte ho, og så sette eg i gong. Saumen langs opninga er sydd med spesialnåla, som let deg legge undertråd på ein enkel måte.. men ikkje like enkelt som med symaskin, hehe. Saumen på sidene sydde eg for hand etter å ha laga hol fyrst.

Eg blei i alle fall veldig fornøgd, sjølv om
familiemedlemmane over 60 trudde det var eit penal!

No skal eg nyte kaffi og filosofi i sola på altanen.

Sukk, (påske)ferie er fint!

Påska er Gul fordi det hadde vore Rart om den var Turkis

2011-04-19T22:08:00.000+02:00

Om eg var sju

skulle eg spørje tusen spørsmål

og forvente minst totusen svar!

- Korfor er påska gul?

- Korfor pyntar me med kyllingar? Og egg?

- Korfor ser de vaksne på sånt som de trur eg er for liten til?

- Kortid får eg påskeegg?!

Det er rart med tradisjonar..

For om eg som syttiåring skulle svare

på mine eigne sjuårige spørsmål,

hadde nok svara sett litt sånn ut:

- Så klart er ho gul! Kva skulle ho elles ha vore? Turkis?!

- Fordi kyllingar er så søte! Og så kjem dei jo nyklekte ut av egga, sant?

- Voksenkrim er berre alltid ekstra spanande i påska!

Og sist, men ikkje minst:

- Kortid får eg påskeegg?

Uansett seier eg som tjueåring:

- God påske til alle saman,

for det er ferietid, og tradisjon.

Og sjølv om ein ikkje veit korfor,

så er det fint, godt, og herleg!

Trykk på bileta for å kome til kjeldene

gler meg til den dagen

2011-04-12T20:11:00.000+02:00

ein kan gå i kjole

utan strømper, kåpe, eller sko.

ein kan feste

blomar i håret..

..og bade ute,

utan å vere gal.

bileta fann eg her

om ein ikkje orkar lese på ein måndag

2011-04-11T12:18:00.000+02:00

Om du har lyst å lese novella eg posta for nokre minutt sidan,
men skreiv for ei stund sidan, blir eg veldig glad for det.
Den er ganske kort til novelle å vere, men inneheld kanskje
litt mange ord til å skulle lesast på ein mandag?

I så fall kan du jo spare den til seinare,
og i staden kike innom Flickr-kontoen min,
som for tida ser litt slik ut:

I tillegg vil eg så gjerne takke alle som er innom
for at de faktisk er det, og
for alle fine ord de legg att!
Det er så kjekt å få tilbakemelding på det eg publiserer,
og så er det ekstra kjekt å få vite kven de er,
så eg kan oppdage dei fine
orda & bileta de sjølv legg ut.

Ha ein finfin mandag, og tenk:
det er aldri så lenge til helg!
Ho er alltid rett rundt svingen.
Ventar på å få gje deg løn for strevet,
som ikkje alltid er eit strev, eingong.

Novelle: Korfor du var Vind for meg

2011-04-11T11:45:00.000+02:00

-       Seriøst? Sofie, er det deg då? Etter alle desse åra kjende eg deg ikkje att bak panneluggen, men panneluggen kjende eg jo. Og du er der, sant? han bøygde seg litt ned og fram, så han kunne sjå oppunder luggen min.

-       Jo, det er nok deg, konstanterte han, og lo.

-       Visst pokker!

Eg visste ikkje kva eg skulle seie. Kjende meg ikkje att i spegelen i dag tidleg eg heller, tenkte eg, men det blei for dumt. Eg tenker, difor er eg? Kan aldri vere sikker? Eller… Gav opp, og svara med eit smil. Eit overivrig, og ikkje overbevisande eit. Men han blei ståande der, med det vakre ventande andletet, som eg hugsa så inderleg godt. Hugsa det både frå gongane eg såg han, når eg var på besøk hjå vetlesytra hans. Ho som då var mi beste venninne, og som eg no ikkje lenger kjenner. For ikkje å snakke om alle dei gongane eg tenkte på han før eg fall i svevn, og drøymde at det var ”me”, og ikkje ”eg og broren til besteveninna mi”. Nei, snakk ikkje om det. Eg hadde gløymt kor vakker han var. Kor vakker han er. Eg hugsa brått at eg aldri hadde makta å seie eit einaste ord til han, med mindre eg og broren til besteveninna mi, ikkje var åleine. Åh, herregud, såg han angsten i auga mine no? Eller var det berre Gud som såg den? Kanskje gjorde han det, kanskje ikkje. Uansett blei han ikkje smitta av den kalde sjukdomen. Det var då fint for han, tenkte eg, og smilte litt.

-       Nå, korleis går det? Jobbar på kafé og greier? spurde han, og såg seg rundt. 

Blikket mitt såg ikkje anna enn han. Han såg på meg og smilte, så eg måtte hive auga i bakken. Herregud som eg hata det smilet! Kvar gong eg tvinga meg til å slutte å elske han, var det berre smilet hans som skulle til før eg smelta, fall om, mista pusten. 

Eg såg for meg at knea mine bokstaveleg talt svikta, og han kom meg til unnsetning. Heldt meg mjukt og fast i dei sterke armane sine. Så såg han meg bekymringsfullt inn i auga, og ville spørje om det gjekk bra. Då berre smilte eg, og så sa han:

-       Høyrer du kva eg seier eller? Blitt døv med åra? Eg skulle vel bli døv før deg, og det er lenge til..  

Eg kjende det raude i kinna no, men det hadde vore der heile tida. Eg hadde lært meg å ignorere det, for det var ikkje meir å gjere med. At eg kom til å tenkje på det gjorde raudfargen endå verre. Eg ville berre forsvinne. Men plutseleg kom der nokre lydar, like overraskande på han som på meg:

-       Jo… Jo, eg høyrer kva du..

-       Framleis like distré, skjønar eg? avbraut han, før han fekk med seg at eg hadde begynt å seie noko. Han venta for å la meg fullføre.

Pinleg lenge stille.

-       Mm.. var alt han fekk i honorar for tolmodet. 

Fleire lydar kom der ikkje, og som eit ospelauv prøvde eg å forstå korfor han var vind for meg. Korfor eg blei varm og kald på same tid. Korfor orda eg ville seie, samt ikkje ville seie gjekk til krig mot kvarandre. Gjekk til krig mot meg! Alle skulle ut på same tid, og alle sat fast i opninga. Eg heldt fram å snakke utan lyd, og tankane mista meining. Meininga mista tyding. Tydinga mista det som var att å miste. Ikkje berre hendene mine, men heile kroppen min skalv, og alt for gjennom meg, som den klamme kafélufta mellom fingrane. Tankane mine leikte tante knute, men tante Knute var ikkje med. Ho sat berre i eit hjørne av det runde hovudet mitt og skalv ho også. 

Eg hadde forsvunne ned lenge no, men då eg såg opp, blei eg møtt av det varmaste smilet eg nokon gong har sett. Der, framme i høgre hjørne av kafeen, som sikkert kom til å gå konkurs ein dag så voldsamt som eg sleit med å kommunisere med kundane, sat han. Ein spedbygd liten fyr, med briller, bok, og blå hatt. Det framleis ventande andletet til han som i verkelegheita aldri spurde om det gjekk bra, blei uklårt, slengte i meg ei løgn: 

-       Snakkast, Sofie! og forsvann ut av synesfeltet, ut av kafeen, og ut av livet mitt.

Mannen i hjørnet tok på seg den blå hatten, som låg på stolen ved sida av han. Eg såg spørjande sjenert på han, men smilte då han lyfta den av seg for å helse, og la den fint ned att. Så smilte han til meg, og knea mine svikta. Denne gongen var det verkeleg.

om estetikk og etterlengta regn

2011-04-08T17:47:00.000+02:00

I dag skriv eg, og skriv eg

ei innlevering om korfor, og korleis

estetikken er i stadig endring.

Eigentleg kunne eg berre ha skrive om vatnet.
Om korleis det går i ein evig krets,
fordi det vert forma om og om igjen
av naturen, og av mennesket.
Mennesket, det er oss det!

Og før likte me sånt,

men no likar me dette!

Kretsløpet til vatnet er eigentleg ganske fint,

både der det regnar, flyt, & renn.

Og det er jo så forfriskande med regn,

når det ikkje har regna på lenge!

Kjelder: ein to tre fire

Leve

2011-04-05T16:53:00.000+02:00

Å leve er eit ord

av to verb:

å le, og å ve'.

Å ve' tyder å vere,

i alle fall på min dialekt,

tenkte ho, og lo vidare.

Snikkik

2011-04-04T18:31:00.000+02:00

Ein liten snikkik i mine

kreative tøler

Hermetikkboksar

rommar så mangt!

Skattar, til dømes,

medan dei ventar

på skjebnen.

Den svarte boksen med kvite bladsnurrar

blei med heim frå loppis seinast i går,

og drakk seg full på te-lyskoppar,

som skal bli til stjerner neste vinter.

trykk her, og sjå

den fyrste eg laga?

Korleis ser dine boksar ut?

Og kva rommar dei?

P U L S

2011-03-29T18:05:00.000+02:00

Eg
kjenner hjartet ditt slå:
mjukt og varmt.

Du
kjenner hjartet mitt slå:
trygt og jamt.

Me
flyg til ei verd, tida der
står stille.

Saman
lever me der røynda
byrjar trille.

Novelle på Førtifem Ord

2011-03-28T19:58:00.000+02:00

Tre jenter har piknik i skogen.
I utkanten av ei lysning finn dei eit gamalt hus,
i huset ein nedstøva teboks.

Dei drikk teen.

Draum og røynd drikk av kvarandre.
Sanning av løgn, løgn av sanning.

Skogen blir til ei øy,
jentene til dukker.

Eg lurer på korleis novella endar,

for eg har så vidt byrja skrive den.

Have a cup of tea, love.

2011-03-27T20:04:00.000+02:00

Te er magisk.

Skulle ynskje det var eg som hadde tatt desse bileta,

men eg fann dei på weheartit og andre fine sider.

ein to tre fire fem seks sju

Om eg mista, hadde eg.

2011-03-20T15:39:00.000+01:00

Om eg mista stemma, hadde eg sunge med augene.

Om eg mista augene, hadde eg sett med øyrene.

Om eg mista øyrene, hadde eg lytta med hendene.

Om eg mista hendene, hadde eg malt med føtene.

Om eg mista føtene, hadde eg dansa med sinnet.

Om eg mista sinnet, hadde eg undrast med hjartet.
Om eg mista hjartet, hadde eg ikkje hatt meir å miste.

Biletkjelder:

Fotmaling: CHINA FOTO PRESS/BARCROFT MEDIA

Marilyn Monroe, og balettsvane: trykk på biletet

Snurremuffins

2011-03-19T19:51:00.000+01:00

I dag er det fastelaven,
for me har ete fastelavensbollar!

..betre seint enn aldri.

Og så har eg laga bjørnebærmuffins.

som berre er vanlege kakaomuffins,
(bortsett frå at dei dansar,)
men med det vetle ekstra:

..sidan det var fastelaven måtte eg pynte med melis!

Har du forresten tenkt på dette:
om ein stokkar om bokstavane,
kan melis bli til smile?

..så eg vil ynskje deg ein finfin laurdagskveld med mykje melis! ;)

Ananaslykt

2011-03-17T22:42:00.000+01:00

Å lage nytt av gamalt er lurt og lønsamt,

og det får moder jord til å puste letta ut,

om så berre for nokre små sekund.

Før var denne full av frukt.

No er den full av fuglar,

som flyg mot sommaren

Skulle ynskje tida også ville fly!

Så kunne eg gå med sko som

vinteren jagde vekk, snart.

Å reise

2011-03-16T14:14:00.000+01:00

Det fins mange måtar å reise på.

Ein kan lese ei fantastisk bok, danse med augo att, eller forelske seg!

Då reiser ein så langt fantasien når.

Ein reiser billeg, og ikkje minst akkurat når ein har lyst!

Men ein kan også reise med heile seg,
til Praha, Paris, eller Peru

..eller Nijmegen i Nederland,

der ingen stakk kjeppar i hjula, og der ikkje fanst tunge oppoverbakkar.

Og Paris! Eg saknar dine vakre gater og freistande søte saker!

.. du Praha, eg saknar musikken sånn, og

Peru, ynskjer å bli kjend med deg ein gong..

..Kva reise drøymer du så om?

Korfor pastell?

2011-03-14T21:40:00.000+01:00

- Korfor pastell, lurer du?

Jo, fordi det er fint. Så fint at ein blir glad berre av tanken

på ein lysegul kjole, som sit i ein turkis sofa, og et rosa makronar frå

Paris, av eit lysegrønt fat, og smiler

til den fine kjærasten som drikk te frå ein purpurprikka pastellkopp,

som smiler tilbake.

- Og korfor draum?

Fordi ingenting vert verkeleg om ein ikkje drøymer det fyrst. Og om ein så skulle bli overraska av noko verkeleg, som ein ikkje har drøymt fyrst, er det som ein drøymer det for fyrste gong.

Aldri blå når himmelen

2011-03-12T14:29:00.000+01:00

Hjartebank

2011-03-11T17:30:00.000+01:00

I dag gjekk eg forbi

deg, du stod der,

utanfor hjarte-

banken.

Vende om i døra,

ville ikkje ha

mitt vetle raude

på boks likevel,

for hjarte-

renter får ein

berre her ute,

i det fri.

(Trykk på biletet for å kome til kjelda)

Blanke ark..

2011-03-05T21:07:00.000+01:00

Splitter nye, blanke ark!

Somme rosa, andre lysegrøne,

turkise, fiolette, lysegule,

reine ark,

og eg vil fylle dei
med sånt
som får hjartet
til å smile..

Trykk på bileta av ballongane, makronane, og skoa for å kome til deira respektive kjelder. (Dei andre bileta er mine eigne.)

Følg min blogg med bloglovin